News Continuous Bureau | Mumbai
ગૌતમ અદાણી ( Adani group ) ગ્રૂપ અને હિંડનબર્ગ વિવાદને કારણે અદાણી ગ્રૂપના શેરમાં સતત ઘટાડો થઈ રહ્યો છે. આ સિવાય વિવિધ સેક્ટરના ઘણા શેરો તૂટ્યા છે. હિંડનબર્ગ રિસર્ચના રિપોર્ટ બાદ લાઈફ ઈન્સ્યોરન્સ કોર્પોરેશન ઓફ ઈન્ડિયા એટલે કે LICના શેરમાં પણ કડાકો જોવા મળ્યો છે.
મહત્વનું છે કે અદાણીના 7 શેરોમાં LICનું રોકાણ છે. પરંતુ LIC એ મુખ્યત્વે અદાણી ગ્રુપના 4 શેરોમાં રોકાણ કર્યું છે. આ રોકાણ 24000 કરોડ રૂપિયા છે. આ શેરોમાં અદાણી એન્ટરપ્રાઇઝ, અદાણી ટોટલ ગેસ, અદાણી ગ્રીન એનર્જી અને અદાણી ટ્રાન્સમિશન છે. ડિસેમ્બર 2022 પછી એલઆઈસીએ અદાણીના આ ચાર શેરમાં તેનો હિસ્સો ઓછો કર્યો નથી. આ રોકાણનું મૂલ્ય વર્તમાન બજાર ભાવના આધારે રૂ. 27000 કરોડ છે.
LIC એ અદાણી ગ્રૂપના આ ચાર શેર્સમાં લગભગ રૂ. 23,840 કરોડનું રોકાણ કર્યું છે. 2 ફેબ્રુઆરી 2023 ના રોજ બજાર કિંમતના આધારે, આ રોકાણનું મૂલ્ય 27,200 કરોડ રૂપિયા હતું.
જો કે, અદાણી ગ્રીન એનર્જી અને અદાણી એન્ટરપ્રાઈઝને બાદ કરતાં, એલઆઈસી હજુ પણ બાકીની 2 કંપનીઓના શેર પર નફો કરી રહી છે, જોકે તેનો નફો બુધવારની સરખામણીએ ઘટ્યો છે. બીજી તરફ, જો 24 જાન્યુઆરી સાથે સરખામણી કરવામાં આવે તો, જ્યારે હિંડનબર્ગ રિપોર્ટ આવ્યો, તો અદાણીની આ ચાર કંપનીઓમાં LICનું રોકાણ 57166 કરોડ રૂપિયાનું હતું. એટલે કે ત્યારે LICને 33000 કરોડનો નફો થતો હતો જે હવે ઘટીને 3300 કરોડ થઈ ગયો છે. આ રીતે, ઘણા વર્ષોમાં આ ચાર શેરમાં LIC દ્વારા કમાયેલા લગભગ 30000 કરોડ રૂપિયા માત્ર 10 દિવસમાં જ સ્વાહા થઇ ગયા છે.
અદાણી ટ્રાન્સમિશન
અદાણી ટ્રાન્સમિશનમાં LIC દ્વારા ખરીદવામાં આવેલા દરેક શેરની સરેરાશ કિંમત 840 રૂપિયા છે. અદાણી ટ્રાન્સમિશનમાં LICનું કુલ રોકાણ મૂલ્ય રૂ. 3415 કરોડ છે. 2 ફેબ્રુઆરી 2023ના રોજ આ રોકાણનું મૂલ્ય 6334 કરોડ રૂપિયા હતું. 2 ફેબ્રુઆરીએ અદાણી ટ્રાન્સમિશનના શેર બુધવારના બંધ ભાવથી 10 ટકા ઘટીને રૂ. 1557.25 પર ટ્રેડ થઈ રહ્યા હતા.
આ સમાચાર પણ વાંચો: અદાણી વિશ્વની ટોપ -20 સમૃદ્ધ સૂચિમાંથી બહાર. જાણો હવે કયા ક્રમ પર
અદાણી ટોટલ ગેસ
જો આપણે અદાણી ટોટલ ગેસ વિશે વાત કરીએ, તો એક શેરની અંદાજિત કિંમત 1300 રૂપિયા છે અને અદાણી ટોટલ ગેસમાં LICનું કુલ રોકાણ 8525 કરોડ રૂપિયા છે. આ રોકાણનું હાલનું મૂલ્ય 11225 કરોડ રૂપિયા છે. અહીં વર્તમાનથી એટલે 2 ફેબ્રુઆરી 2023. 2 ફેબ્રુઆરીએ અદાણી ટોટલ ગેસનો શેર રૂ. 1711.50 પર ટ્રેડ થઈ રહ્યો હતો. જે બુધવારના બંધ ભાવ કરતાં 10 ટકા ઓછો છે.
અદાણી ગ્રીન એનર્જી
LIC માટે અદાણી ગ્રીન એનર્જીના એક શેરની કિંમત 1800 રૂપિયા હતી. આ પેઢીમાં કંપનીનું કુલ રોકાણ મૂલ્ય રૂ. 3610 કરોડ છે. 2 ફેબ્રુઆરી 2023ના રોજ આ રોકાણનું મૂલ્ય 2108.2 કરોડ રૂપિયા હતું. અદાણી ગ્રીનનો શેર ગુરુવારે 1038.05 પર ટ્રેડ થઈ રહ્યો હતો, જે બુધવારના બંધ ભાવ કરતાં 10 ટકા ઓછો હતો.
અદાણી એન્ટરપ્રાઇઝ
અદાણી એન્ટરપ્રાઇઝિસમાં LIC દ્વારા ખરીદવામાં આવેલા શેરની સરેરાશ કિંમત રૂ. 1720 હતી. જ્યારે આ રોકાણની કુલ કિંમત 8285 કરોડ છે. 2 ફેબ્રુઆરી 2023ના રોજ આ રોકાણનું મૂલ્ય 9545.6 કરોડ રૂપિયા હતું. અદાણી એન્ટરપ્રાઇઝિસનો શેર બુધવારના બંધ ભાવથી 26.5 ટકા ઘટીને રૂ. 1564.70 પર બંધ થયો હતો.
આ સમાચાર પણ વાંચો: કંગાળ પાકિસ્તાનને IMFએ બતાવ્યો ઠેંગો, પતનના આરે ઊભો છે જિન્નાનો દેશ!
